काठमाडौं , हाल नेपालमा माथिल्लो वायुमण्डलमा उच्च चापको प्रभाव र पूर्वी क्षेत्रको तल्लो वायुमण्डलमा न्यून चापीय क्षेत्रको प्रभाव देखिएको छ
जल तथा मौसम विज्ञान विभागको मौसम पूर्वानुमान महाशाखाका अनुसार कोशी, मधेश, बागमती, गण्डकी र लुम्बिनी प्रदेशका पहाडी तथा हिमाली भूभागमा सामान्यतया बदली रहेको छ भने अन्य पहाडी क्षेत्रमा आंशिक बदली रहेको छ। तराईका केही स्थानमा भने हुस्सु लागेको छ।
महाशाखाले दिउँसो कोशी, बागमती र गण्डकी प्रदेशका पहाडी तथा हिमाली क्षेत्रमा तथा लुम्बिनी, कर्णाली र सुदूरपश्चिम प्रदेशका एक–दुई स्थानमा मेघगर्जन तथा चट्याङसहित हल्का वर्षा वा हिमपात हुने सम्भावना रहेको जनाएको छ।
काठमाडौं उपत्यकामा पनि आज दिनभर सामान्य बदली रहने र हल्का वर्षाको सम्भावना रहेको विभागले जनाएको छ।त्यस्तै राति कोशी र गण्डकी प्रदेशका पहाडी तथा हिमाली क्षेत्रमा तथा बागमती प्रदेशका एक–दुई स्थान र कोशी प्रदेशको तराई क्षेत्रमा मेघगर्जन तथा चट्याङसहित हल्का वर्षा वा हिमपात हुन सक्ने अनुमान गरिएको छ। साथै तराईका केही स्थानमा हुस्सु लाग्ने सम्भावना पनि रहेको महाशाखाले जनाएको छ।
