नमूना कलेज अफ फेसन टेक्नोलोजी (NCFT) ले आफ्नो बहुप्रतीक्षित २१औँ ग्राजुएसन फेसन शो ‘अनन्तरूपवितानम् (Anantarūpavitānam)’ का लागि आयोजित आधिकारिक मोडल अडिसन सफलतापूर्वक सम्पन्न गरेको छ। आगामी २०२६ अक्टोबर १० मा ललितपुरको पुल्चोकस्थित द प्लाजा मा आयोजना हुने यस प्रतिष्ठित फेसन समारोहका लागि देशभरबाट आएका करिब दुई सय आकांक्षी मोडलहरूले सहभागिता जनाउँदै आफ्नो प्रतिभा प्रदर्शन गरेका थिए।

अडिसनमा सहभागी मोडलहरूको मूल्याङ्कन रनवे प्रस्तुति, आत्मविश्वास, शारीरिक मुद्रा (पोश्चर), अभिव्यक्ति, स्टेज प्रेजेन्स, व्यक्तित्व तथा समग्र प्रस्तुतिका आधारमा गरिएको थियो। निर्णायक मण्डलमा फेसन कोरियोग्राफर तथा एनसीएफटीका प्राध्यापक रोजिन शाक्य, फेसन स्टाइलिस्ट आसिम रानाभाट, फेसन कोरियोग्राफर अजय गुरुङ, फेसन डिजाइनर निशा श्रेष्ठ, साथै स्नातक डिजाइनरहरूको प्रतिनिधित्व गर्दै समन थापा र रुसाना ल्वागुन रहेका थिए। छनोट भएका मोडलहरूले अब व्यावसायिक ग्रुमिङ, कोरियोग्राफी प्रशिक्षण, कस्ट्युम फिटिङ तथा नियमित रिहर्सलमार्फत अन्तिम प्रस्तुतिका लागि आफूलाई तयार गर्नेछन्।

यस वर्षको ग्राजुएसन फेसन शो “Cosmic Threads of Heritage: Nepal Beyond Time and Universe” अवधारणामा आधारित रहेको छ। यसको संस्कृत शीर्षक ‘अनन्तरूपवितानम्’ ले एउटै साझा ब्रह्माण्डअन्तर्गत सौन्दर्य, पहिचान, संस्कृति र सिर्जनशीलताका असीमित आयामहरूको प्रतीकात्मक अभिव्यक्ति गर्दछ। कार्यक्रममा छ वटा विशेष फेसन कलेक्सन, ५४ मौलिक डिजाइन तथा छ सिर्जनात्मक मास्टरपिस प्रस्तुत गरिनेछन्, जसलाई एनसीएफटीको २१औँ ब्याचका ५४ स्नातक डिजाइनरहरूले सिर्जना गरेका हुन्। यही टोलीले यस वर्षको ग्राजुएसन फेसन शोको सम्पूर्ण व्यवस्थापन तथा आयोजनाको जिम्मेवारी पनि सम्हालिरहेको छ।

नेपालमा फेसन शिक्षाको अग्रणी संस्थामध्ये एकका रूपमा स्थापित नमूना कलेज अफ फेसन टेक्नोलोजीले दुई दशकभन्दा बढी समयदेखि दक्ष फेसन डिजाइनर, उद्यमी, स्टाइलिस्ट, प्रशिक्षक तथा सिर्जनात्मक व्यवसायी उत्पादन गर्दै आएको छ। कलेजको वार्षिक ग्राजुएसन फेसन शोले शैक्षिक उत्कृष्टता र व्यावसायिक अभ्यासबीच प्रभावकारी सेतु निर्माण गर्दै उदीयमान डिजाइनर तथा मोडलहरूलाई आफ्नो प्रतिभा प्रदर्शन गर्ने प्रतिष्ठित मञ्च उपलब्ध गराएको छ। यसले नेपाली फेसन उद्योगको विकास, व्यवसायीकरण तथा अन्तर्राष्ट्रिय सम्भावनालाई थप सुदृढ बनाउन उल्लेखनीय योगदान पुर्‍याउँदै आएको छ।