काठमाडौँ, गीतकार सङ्घ नेपालको १७औँ वार्षिकोत्सवका अवसरमा आयोजित ‘सम्मान तथा पुरस्कार समारोह एवं सांगीतिक कार्यक्रम’ आइतबार काठमाडौँमा सम्पन्न भएको छ ।

भृकुटीमण्डपस्थित नेपाल पुलिस क्लबमा आयोजित कार्यक्रममा प्रतिष्ठित गीतकार किरण खरेलको प्रमुख आतिथ्यता तथा गीतकार सङ्घ नेपालका अध्यक्ष वसन्त बित्यासी थापाको सभापतित्व रहेको थियो ।

समारोहमा पाँच दशकभन्दा लामो समयदेखि नेपाली कला तथा गीत–सङ्गीत क्षेत्रमा योगदान पुर्‍याउँदै आएका गीतकार नीर शाहलाई ‘अमरभावना राष्ट्रिय स्रष्टा सम्मान’ प्रदान गरिएको छ । शाहलाई नगद रु. १ लाख ५१ हजारसहित सम्मानपत्र, माला र दोसल्लाले सम्मान गरिएको हो ।

शाहका ‘बादल बनाई देऊ आकार बदल्न सकुँ’, ‘गहिराइमा डुब्दै नडुब’, ‘पर्खी बसेँ आउला भनी’, ‘कहिलेकाहीँ हाँस्छु धेरै नै हाँस्छु’, ‘तिमीसँग डुङ्गामा घुम्दा घुम्दै फेवाताल’, ‘खुल्दैन ताल्चा त्यो ढोकाको’, ‘हिउँभन्दा चिसो, आगोभन्दा तातो’, ‘आँखैमा कसैको तस्बिर’, ‘अर्को जुनी चाहिँदैन मलाई’, ‘प्यारी वसन्ती’ र ‘पसिनाको जलैले’ लगायतका गीत चर्चित छन् ।

यसैगरी, यस वर्षको ‘डायस्पोरा गीतकार सम्मान’ गीतकार नीलम आङ्बुहाङ राईलाई नगद रु. १५ हजारसहित प्रदान गरिएको छ । विदेशमा रहेर पनि नेपाली गीत लेखनमा सक्रिय राईका ‘पुरानो हुँदैन माया’ र ‘पानी मिठो मेरो हजुर इलाम बजारको’ लगायतका गीत चर्चित छन् ।

‘विष्णु मन्सरा घले मातृभाषा गीतकार सम्मान’ लोहोरुङ राई भाषाका स्रष्टा नइन्द्र लोहोरुङ राईलाई नगद रु. २५ हजार २५२ सहित प्रदान गरिएको छ ।

‘हरिभक्त बुढाथोकी प्रतिभा गीतकार सम्मान–२०८२’ बाट गीतकार सुशिला पौडेल र अरुण तिवारीलाई जनही रु. १५ हजारसहित सम्मान गरिएको छ । यसै वर्षदेखि सुरु गरिएको ‘गीतकार सङ्घ नेपाल पत्रकारिता सम्मान–२०८२’ बाट हिमालय टाइम्सका उपसम्पादक तथा वरिष्ठ पत्रकार कृष्ण भुसाललाई नगद रु. ५ हजार ५५५ सहित सम्मान गरिएको छ ।

कार्यक्रममा ‘जगतमर्दन थापा वर्ष गीति पुस्तक पुरस्कार–२०८२’ कल्पना खरेलको कृति ‘नन्दिनी’ र ज्ञानेन्द्र गदालनको कृति ‘भोलिको आश उज्यालो प्रकाश’लाई प्रदान गरिएको छ । दुवै कृतिका लागि पुरस्कार राशि रु. ५७ हजार रहेको जनाइएको छ ।

त्यस्तै, ‘भैरवनाथ रिमाल (कदम) वर्ष गीत पुरस्कार’ बाट डम्बर याक्सोको ‘म तिम्रो नजरमा’ र प्रबल विष्टको ‘भुल्न सकिनँ’ गीत पुरस्कृत भएका छन् ।

समारोहमा सम्मान तथा पुरस्कार वितरणसँगै अग्रज गीतकारका १० वटा कालजयी गीत प्रत्यक्ष सङ्गीतसहित प्रस्तुत गरिएको थियो । सम्मानित गीतकार नीर शाहको ‘गहिराइमा डुब्दै नडुब’ गायक जगदीश समालले प्रस्तुत गरेका थिए । गीतकार डा. भोला रिजालको ‘मेरो पौवा पाटीलाई’ सञ्जय तुम्रोकले प्रस्तुत गरेका थिए ।

दिवंगत गीतकार गणेश रसिकप्रति श्रद्धाञ्जली अर्पण गर्दै उनको चर्चित गीत ‘धेरै सम्झे धेरै हुन्छ’ गायक अशोक मुकारुङले प्रस्तुत गरेका थिए । एसपी कोइरालाको चलचित्र ‘ग्रहण’ को ‘धड्कनभित्र लुकाइदेऊ न’ रूपक चौधरी र बिनुषा राईले युगल रूपमा प्रस्तुत गरेका थिए ।

अमर बान्तुको ‘आमा’ निशा देसार, बसन्त चौधरीको ‘मेरो प्यारो मान्छे’ माण्डवी त्रिपाठी तथा डा. कृष्णहरि बरालको ‘मर्ने कसैलाई रहर हुँदैन’ बाल गायक प्रेम परियारले प्रस्तुत गरेका थिए । योगेन्द्रमणि दाहालको ‘बादलहरू हो’ सञ्जय तुम्रोक र चूडामणि देवकोटाको ‘तिम्रो पनि रगत’ सुमित खड्काले प्रस्तुत गरेका थिए । शुभ मुकारुङको शब्द रहेको ‘तिमीले मलाई छाडिगए’ गणेश पराजुलीले प्रस्तुत गरेका थिए ।

वरिष्ठ सङ्गीतकार अशोककुमार राईको सङ्गीत संयोजनमा १५ जना वाद्यवादकले प्रत्यक्ष सङ्गीत दिएका थिए । समारोहमा सङ्घका आजीवन सदस्यता प्राप्त गीतकारलाई प्रमाणपत्र वितरण गर्नुका साथै कार्यक्रमलाई विभिन्न माध्यमबाट सहयोग गर्ने व्यक्ति तथा संस्थालाई मायाको चिनो प्रदान गरिएको थियो ।

कार्यक्रममा सङ्घका अध्यक्ष तथा समारोहका सभापति वसन्त बित्यासी थापाले प्राकृतिक विपत्तिका कारण कार्यक्रम निर्धारित समयमा आयोजना गर्न नसकिएको जानकारी दिए । भदौ १० गते आएको बाढीपहिरो तथा प्राकृतिक विपत्तिका कारण कार्यक्रम स्थगित गर्नुपरेको र कार्यक्रमका लागि छुट्याइएको रकममध्ये रु. १ लाख १५ हजार प्रधानमन्त्री दैवी प्रकोप उद्धार कोषमा सहयोग गरिएको उनले बताए ।

नेपाली गीत–सङ्गीत र शब्दको गरिमा उच्च राख्न सङ्घ प्रतिबद्ध रहेको उल्लेख गर्दै अध्यक्ष थापाले समारोहमा उपस्थित अतिथि, स्रष्टा, कलाकार तथा सहयोगी सबैप्रति आभार व्यक्त गरे ।

समारोहमा नेपाल सङ्गीत तथा नाट्य प्रज्ञा–प्रतिष्ठानका कुलपति ब्रजेश खनाल, सदस्य–सचिव भूपेन्द्र रायमाझी, सङ्गीत रोयल्टी सङ्कलन समाज नेपालका अध्यक्ष सुरेश अधिकारी, चलचित्र कलाकार सङ्घका अध्यक्ष उत्तम केसी, सांगीतिक सङ्घ नेपालका अध्यक्ष मिलन मोक्तान, वरिष्ठ पत्रकार सानुकाजी श्रेष्ठ, साहित्यिक पत्रकार सङ्घका अध्यक्ष राधेश्याम लेकालीलगायत कला, साहित्य तथा सङ्गीत क्षेत्रका व्यक्तित्वको उपस्थिति थियो ।

गीतकार सङ्घ नेपालका संस्थापक अध्यक्ष कृष्णहरि बराल, गीतकार भोला रिजाल, एसपी कोइराला, राजेन्द्र थापालगायत गीतकार तथा स्रष्टाको पनि कार्यक्रममा सहभागिता रहेको थियो ।

सञ्चारकर्मी तथा सङ्घका आजीवन सदस्य हेम सुवेदीले सञ्चालन गरेको कार्यक्रम रेडियो आहा १०४.५ मेगाहर्ज तथा रेडियोको फेसबुक पेजबाट प्रत्यक्ष प्रसारण गरिएको थियो ।