मोगादिशु,सोमालिया, सोमालियाको राजधानी मोगादिशुको रेस्टुरेन्ट (क्याफे) मा भएको विस्फोटमा ज्यान गुमाउनेको सङ्ख्या नौ पुगेको सुरक्षा स्रोतले सोमबार बताएको छ । यूरो कप २०२४ फाइनल हेर्ने फुटबल प्रशंसकहरूले भरिएको उक्त सार्वजनिक स्थलमा कार बम विस्फोट भएको स्रोतले जनाएको छ ।
विस्फोटमा नौ जना सर्वसाधारणको मृत्यु हुनुका साथै अन्य २० जना घाइते भएको राष्ट्रिय सुरक्षा निकायका अधिकारी मोहम्मद युसुफले बताउनुभयो ।
उहाँका अनुसार घटनाको समयमा रेस्टुरेन्टमा अधिकांश युवासहित धेरै मानिसहरूले फुटबल खेल हेरिरहेका थिए । भाग्यले तिनीहरूमध्ये अधिकांशले सिँढीबाट माथि चढेर पछाडिको पर्खालमाथि उफ्रिएर सुरक्षित बाहिर निस्किन सफल भएको उहाँले बताउनुभयो । आइतबार सहरको केन्द्रमा रहेको रेस्टुरेन्टमा विस्फोट हुँदा रातको आकाशमा ठुलो आगोको लप्को र धुवाँको मुस्लो उडिरहेको अनलाइनमा पोस्ट गरिएका तस्बिरमा देखिन्छ ।
विस्फोट भएको केही मिनेटपछि घटनास्थलमा पुगेका प्रहरी अधिकारी मोहम्मद सलादीले भग्नावशेषमा धेरै शव फेला परेको बताउनुभयो ।घटनामा भवन बाहिर सडक क्षेत्रमा गाडी चलाइरहेका सवारी चालकसहित पाँच जनाको मृत्यु भएको उहाँले बताउनुभयो । चार जनाको मृत्यु भएको र तीमध्ये केहीलाई भग्नावशेष मुनिबाट निकालिएको उहाँले बताउनुभयो ।कुनै पनि समूहले विस्फोटको जिम्मेवारी लिएको छैन, तर राज्य सञ्चालित सोमाली राष्ट्रिय समाचार संस्थाले अल–कायदासँग सम्बन्धित अल–सबाब जिहादी समूहले आक्रमण गरेको सङ्केत गरेको छ ।
सोमालियाको कमजोर सङ्घीय सरकारविरुद्ध अल–शबाबल १७ वर्षभन्दा बढी समयदेखि रक्तपातपूर्ण विद्रोह गर्दै आएको छ । यसै क्रममा मोगादिशु र देशका अन्य ठाउँमा थुप्रै स्थानमा उक्त समूहले बम विस्फोट गराएको छ ।प्रत्यक्षदर्शीले विस्फोटपछि आतङ्क र अराजकताका दृश्यहरू वर्णन गर्दै मानिसहरू सुरक्षाको लागि हतारिँदा क्याफेको मुख्य प्रवेशद्वार पूर्णरूपमा आगोले जलेको बताउनुभयो ।“म रेस्टुरेन्टभित्र फुटबल खेल हेरिरहेको बेला ठुलो विस्फोटको आवाज सुनेँ, रेस्टुरेन्टको अगाडिको भागमा धुवाँ, धुलोसहित आगो लागेको थियो र हामी आतङ्कित भयौँ,” मुक्तरले भन्नुभयो ।
अन्य धेरै व्यक्तिहरू मुख्य प्रवेशद्वारतिर हतारिँदै गएको तथा यो दुर्गम क्षेत्र भएकाले ‘रगत बगिरहेका र चिच्याइरहेका’ घाइतेलाई तत्काल उपचार सेवा प्रबाह गर्न नसकिएको उहाँले बताउनुभयो ।
