नेपाल शैक्षिक परामर्श संघ (ECAN) को आगामी २०औँ साधारणसभा एवं महाधिवेशनबाट नयाँ नेतृत्व चयन हुने तयारी छ। वर्तमान अध्यक्ष शेषराज भट्टराई नेतृत्वको कार्यसमितिको दुईवर्षे कार्यकाल सकिएपछि, आगामी पुस २८ गते हुने निर्वाचनका लागि संगठनमा चुनावी हलचल तीव्र भएको छ।

अध्यक्ष पदका लागि दुई मुख्य प्यानलबीच प्रत्यक्ष प्रतिस्पर्धा हुने अपेक्षा गरिएको छ: दीपकराज भुषाल प्यानल, लक्ष्मण पौडेल प्यानल . यस प्यानल प्रतिस्पर्धासँगै अध्यक्षसहित १८ पदका लागि उम्मेदवारहरूको दौडधुप पनि जारी छ।

यसैबीच, काभ्रेका युवा शैक्षिक परामर्श व्यवसायी नवराज नेपाल (NABU) ले ECAN केन्द्रीय सदस्य पदमा आफ्नो उम्मेदवारी औपचारिक रूपमा घोषणा गर्नुभएको छ। उहाँ लामो समयदेखि शैक्षिक परामर्श क्षेत्रमा सक्रिय रहँदै आएका हुनुहुन्छ र काभ्रे क्षेत्रमा संगठन विस्तार, सदस्य एकता, कानुनी प्रक्रिया र लाइसेन्स व्यवस्थापनमा उल्लेखनीय योगदान पुर्‍याइसक्नुभएको छ।

उहाँको भिजनमा युवा नेतृत्व विकास, सदस्यमैत्री सेवा, स्पष्ट नीति–नियमको प्रभावकारी कार्यान्वयन, र ECAN लाई अझ व्यावसायिक, उत्तरदायी र विश्वासिलो संस्था बनाउने प्रतिबद्धता समावेश छ।

हालसम्म केन्द्रीय सदस्य पदका लागि नवराज नेपाल (NABU) सहित ८ जना उम्मेदवारले आफ्नो उम्मेदवारी घोषणा गरिसकेका छन्।

ईक्यानमा सात सयभन्दा बढी व्यवसायीहरू आवद्ध छन् र देशभर आठ शाखा रहेका छन्। आगामी निर्वाचनले संगठनको युवा नेतृत्व, पारदर्शिता र संस्थागत सुदृढीकरणमा कति प्रभाव पार्छ भन्ने कुरामा सबैको ध्यान छ।

उम्मेदवारहरूले साझा उद्देश्य शैक्षिक परामर्श व्यवसायलाई व्यवस्थित, सम्मानजनक र सदस्यमैत्री बनाउने रहेको बताएका छन्। यस निर्वाचनबाट अध्यक्ष र केन्द्रीय सदस्य पदमा नयाँ ऊर्जा, विश्वास र समावेशी नेतृत्व थपिने विश्वास व्यक्त गरिएको छ।