ललितपुर, असार २८। नेपाल मेडिसिटी (अश्विन्स मेडिकल कलेज एण्ड हस्पिटल प्रा.लि.) र ललितपुर चेम्बर अफ कमर्स (एलसीसी) बीच स्वास्थ्य सेवा तथा उपचार सुविधामा सहकार्य गर्ने उद्देश्यले दुई वर्षे समझदारीपत्र (MoU) मा हस्ताक्षर भएको छ।

भैँसेपाटीस्थित नेपाल मेडिसिटी अस्पताल परिसरमा आइतबार सम्पन्न कार्यक्रममा नेपाल मेडिसिटीका प्रमुख कार्यकारी अधिकृत (CEO) डा. अमित टोमर र ललितपुर चेम्बर अफ कमर्सका अध्यक्ष पुष्परत्न शाक्य ले समझदारीपत्रमा हस्ताक्षर गर्नुभयो।

सम्झौताअनुसार ललितपुर चेम्बर अफ कमर्सका कर्मचारी, सदस्य तथा उनीहरूका प्रत्यक्ष आश्रित (पति/पत्नी, अभिभावक तथा २२ वर्षमुनिका दुई सन्तान) ले नेपाल मेडिसिटीमा उपलब्ध हुने इनपेसेन्ट तथा आउटपेसेन्ट अस्पताल सेवामा १० प्रतिशत छुट प्राप्त गर्नेछन्। औषधि, उपभोग्य सामग्री, इम्प्लान्ट, प्याकेज तथा आउटसोर्स गरिएका परीक्षणमा भने छुट लागू नहुने उल्लेख गरिएको छ।

सम्झौतामा सेवाग्राहीको गोपनीयता कायम गर्ने, सम्पर्क अधिकारी (Point of Contact) तोक्ने, परिचयपत्र वा आधिकारिक प्रमाणीकरणका आधारमा सेवा उपलब्ध गराउने, कर बीजक जारी गर्ने तथा बीमा भएका सेवाग्राहीका लागि क्यासलेस स्वास्थ्य सेवा सम्बन्धी आवश्यक समन्वय गर्ने व्यवस्था गरिएको छ।

दुई वर्षसम्म प्रभावकारी रहने उक्त समझदारी दुवै पक्षको आपसी सहमतिमा नवीकरण गर्न सकिने तथा आवश्यक संशोधन लिखित सहमतिबाट मात्र हुने प्रावधान पनि समावेश गरिएको छ।

यस सहकार्यले ललितपुर चेम्बर अफ कमर्ससँग आबद्ध सदस्य तथा कर्मचारीलाई गुणस्तरीय स्वास्थ्य सेवामा सहज पहुँच विस्तार गर्नुका साथै निजी क्षेत्र र स्वास्थ्य संस्थाबीचको सहकार्यलाई थप सुदृढ बनाउने विश्वास व्यक्त गरिएको छ।