ग्रीन आर्ट्स मिडियाको आयोजना तथा लायन्स क्लब इन्टरनेसनल डिस्ट्रिक्ट ३२५ एफको सहकार्यमा आयोजित मिस एण्ड मिसेस् डिसेबिलिटी क्विन नेपाल २०२६ हेरिटेज गार्डेन, सानेपा, ललितपुरमा भव्य रूपमा सम्पन्न भएको छ। प्रतियोगितामा विभिन्न क्षेत्र र पृष्ठभूमिका १५ जना प्रतियोगी सहभागी भएका थिए। कार्यक्रमले सौन्दर्यलाई बाह्य स्वरूपमा मात्र सीमित नराखी क्षमता, प्रतिभा, आत्मविश्वास, व्यक्तित्व, सिर्जनशीलता र सामाजिक समावेशितालाई केन्द्रमा राखेको थियो।

प्रतियोगितामा मिसेस् डिसेबिलिटी क्विन नेपाल २०२६ को उपाधि उमा भुजेल ले जितिन्। उनले सर्वाधिक अनुशासित को उपाधि समेत हासिल गर्दै रु. १५ हजार नगद पुरस्कार प्राप्त गरिन्। त्यसैगरी मिस डिसेबिलिटी क्विन नेपाल २०२६ को ताज तिला बस्याल ले जितिन्। उनले सर्वाधिक प्रतिभाशाली को उपाधिसहित रु. १५ हजार नगद पुरस्कार प्राप्त गरिन्। निरुता मगर प्रथम उपविजेता घोषित भइन्। उनले सर्वाधिक फोटोजेनिक को उपाधि समेत प्राप्त गर्दै रु. १० हजार नगद पुरस्कार हासिल गरिन्। खेन्दो तामाङ द्वितीय उपविजेता बनिन् भने उनले बब्ली व्यक्तित्व को उपाधिसहित रु. ५ हजार नगद पुरस्कार प्राप्त गरिन्।

प्रतियोगितामा परिचय चरण, प्रतिभा प्रदर्शन चरण तथा प्रश्नोत्तर चरण समावेश थिए। प्रतिभा प्रदर्शन चरणमा प्रतियोगीहरूले नृत्य, गायन तथा कविता वाचनमार्फत आफ्नो सिर्जनशीलता, आत्मविश्वास र व्यक्तिगत क्षमता प्रस्तुत गरेका थिए। प्रश्नोत्तर चरणले उनीहरूको विचार अभिव्यक्ति, समसामयिक बुझाइ, आत्मविश्वास र सञ्चार क्षमताको समेत परीक्षण गरेको थियो। कार्यक्रमको निर्देशन, कोरियोग्राफी तथा मेन्टरिङ अनिला श्रेष्ठ ले गरेकी थिइन्। उनको नेतृत्वमा प्रतियोगीहरूले मञ्चीय प्रस्तुति, आत्मविश्वास, व्यक्तित्व तथा कार्यक्रमअनुकूल प्रस्तुतीकरणमा प्रशिक्षण प्राप्त गरेका थिए। प्रतियोगिताले बाह्य सौन्दर्यभन्दा माथि उठेर प्रत्येक सहभागीको क्षमता, प्रतिभा, व्यक्तित्व र आत्मनिर्भरतालाई प्राथमिकता दिएको थियो। प्रतियोगिताको निर्णायक मण्डलमा रोहिया महर्जन, नृत्य कोरियोग्राफर तथा नेपा डान्स एकेडेमीकी संस्थापक; दिवस योन्जन, एलसीसीआई ग्लोबल क्वालिफिकेसन्सका साझेदारी तथा विकास प्रमुख एवं आतिथ्य परामर्शदाता; आकाश मगर, अभिनेता; तथा सानी सुब्बा शेर्पा, आईआईएफटी स्कुल अफ फेसन एण्ड इन्टेरियर डिजाइनकी निर्देशक तथा शेर्पा ग्रुपकी निर्देशक रहेका थिए। विभिन्न क्षेत्रका अनुभवी व्यक्तित्वहरूको सहभागिताले प्रतियोगिताको मूल्याङ्कनलाई बहुआयामिक र व्यावसायिक बनाएको थियो।

कार्यक्रममा माननीय गंगा छन्त्याल, सांसद, आदिवासी महिला, अपाङ्गता भएकी व्यक्तित्व तथा उद्यमी, विशिष्ट अतिथिका रूपमा सहभागी थिइन्। त्यसैगरी लायन्स इन्टरनेसनल डिस्ट्रिक्ट ३२५–एफका डिस्ट्रिक्ट गभर्नर लायन अजयप्रसाद खनाल प्रमुख अतिथिका रूपमा उपस्थित थिए। उनीहरूको उपस्थितिले अपाङ्गता भएका व्यक्तिहरूको अधिकार, प्रतिनिधित्व, आत्मनिर्भरता र सामाजिक समावेशिताको विषयलाई थप अर्थपूर्ण बनाएको थियो। मिस एण्ड मिसेस् डिसेबिलिटी क्विन नेपाल २०२६ प्रतियोगिताले समाजमा विद्यमान परम्परागत धारणालाई चुनौती दिँदै अपाङ्गता सीमितता होइन, फरक क्षमता र सम्भावनाको परिचय हो भन्ने सन्देश प्रवाह गरेको छ। हेरिटेज गार्डेनमा सम्पन्न यस कार्यक्रमले समावेशी फेसन, सौन्दर्य तथा मनोरञ्जनको क्षेत्रमा नयाँ सम्भावनाको ढोका खोल्दै क्षमतामाथि विश्वास, आत्मविश्वासमार्फत सशक्तीकरण र विविधताको सम्मान नै वास्तविक सौन्दर्यको आधार भएको सशक्त सन्देश दिएको छ।