काठमाडौं, मोडलिङ क्षेत्रमा आफ्नो भविष्य खोज्ने युवतीहरुलाई मोडलिङ सम्बन्धी व्यवसायिक प्रशिक्षणका साथै मोडलिङका विभिन्न विधामा अवसर प्रदान गर्दै उनीहरुलाई व्यवसायिक बनाउने हेतुले आयोजना गरिंदै आएको नेपाल्स नेक्स्ट सुपर मोडलको सिजन ५ को तयारी प्रभावकारी रुपमा अघि बढ्दै गरेको छ । मोडल प्रतिस्पर्धाको ढाँचामा प्रस्तुत गरिने यो प्रतियोगिताको उपाधि दौडमा ११ जना युवतीहरुको सहभागिता रहेको छ । मोडलिङका विविध आयामसित साक्षात्कार गराउँदै तालिम प्रदान गरिंदै गरेको यस प्रतियोगिताका सहभागिहरु कोरियोग्राफर एवं संचारकर्मी रोजिन शाक्यको कोरियोग्राफी अन्तर्गत ग्रुुमिङ प्रक्रियामा रहेका छन् ।
आर एण्ड आर ग्रुपको आयोजनामा संचालन हुने प्रतियोगिताको फाइनल प्रतिस्पर्धा यही माघ ६ गते नयाँ बानेश्वरस्थित द होटल एभरेष्टमा सम्पन्न गरिने भएको छ । खल्ती एप पावर्ड बाइ रहेको प्रतियोगितामा आईआईएफी अटायर पार्टनरका रुपमा रहेको छ भने पम्फाज् फेसनले थीम पार्टनरमा रुपमा सहकार्य गरेको छ । प्रतियोगिहरुको मेकओभरको जिम्मेवारी ग्रुमिङ पार्टनरका रुपमा ब्युटी गार्डेन, द ग्रुमिङ स्टेशनले लिएको छ । हालसम्म अघिल्ला चार संस्करणहरुमा क्रमशः करिष्मा के.सी., सृष्टि तामाङ, स्वस्तिका प्रधान र सदा थापाले नेपाल्स नेस्क्ट सुपर मोडलको उपाधिमा आफ्नो नाम दर्ता गराइसकेका छन् ।