अमेरिकाको लुसियानास्थित न्यु ओरियन्स् मोरियल कन्भेन्सन सेन्टरमा सम्पन्न भएको ७१आंै संस्करणको मिस युनिभर्सको प्रतियोगिताको फाइनल प्रतिस्पर्धामा अमेरिकी सुन्दरी आरबोन्नी गाब्रियलले मिस युनिभर्स २०२२ को ताज चुम्न सफल भएकी छिन् । प्रतियोगितामा विगत दश वर्ष यता अमेरिकी सुन्दरीले मिस युनिभर्सको ताज जितेको यो पहिलो अवसर हो । यो संगै अमेरिकी सुन्दरीले मिस युनिभर्सको ताज जितेको यो नवौं अवसर हो । विश्वका ८४ जना सुन्दरीहरुको सहभागिता रहेको यो प्रतियोगितामा भेनेजुएलाकी अमान्डा डुडामेल फस्र्ट रनर्स अप तथा डोमिनिकन रिपब्लिककी आन्ड्रीना मार्टिनेज् सेकेन्ड रनर्स चयन भइन् । प्रतियोगिताको स्पेशल अवार्डतर्फ मिस कन्जिनियालिटीमा चिलीकी सोफिया डेपासियर तथा माल्टाकी म्याक्सिन फोरमोसा विजेता छानिएको थियो भने थाइल्याण्डकी एना सुएन्गामइआमलाई सोसल इम्प्याक्ट अवार्ड र युक्रेनकी भिक्टोरिया अपानासेन्कोलाई स्पिरिट अफ कार्निभल अवार्ड प्रदान गरिएको थियो ।
२८ वर्षिया मिस युनिभर्स २०२२ विजेता आरबोन्नी गाब्रियल पेशाले मोडल, फेसन डिजाइनर एवं सिलाई प्रशिक्षक पनि हुन् । उनी मिस अमेरिका बनेकी पहिलो फिलिपिनो अमेरिकी हुन् । उनी मिस युएसए २०२२ की विजेता हुन् भने २०२१मा उनी मिस टेक्सास् युएसए प्रतियोगितामा फस्र्ट रनर्स अप बनेकी थिइन् । मिस युनिभर्स २०२२ मा नेपालका तर्फबाट मिस युनिभर्स नेपाल २०२२ की विजेता सोफिया भुजेलको सहभागिता रहेको थियो ।