अन्तर्राष्ट्रिय सौन्दर्य तथा महिला व्यक्तित्वको प्रतिष्ठित मञ्चमा नेपालले पुनः सशक्त उपस्थिति जनाउने तयारी गरेको छ। मिसेस नेपाल इन्टरनेसनल वर्ल्ड २०२६ का विजेता सुमित्रा श्रेष्ठ (रोसी), प्रथम रनर–अप कल्पना प्रसाईं (कामना) तथा तेस्रो रनर–अप गंगा न्यौपाने राउत (गम्भीर गंगा) ले आगामी मिसेस एसिया इन्टरनेसनल २०२६ तथा मिसेस क्लासिक एसिया इन्टरनेसनल २०२६ मा नेपालको प्रतिनिधित्व गर्ने भएका छन्। नेपाली प्रतिनिधिमण्डल १२ अक्टोबर २०२६ मा थाइल्यान्डको खोन काएनतर्फ प्रस्थान गर्नेछ। प्रतिनिधिमण्डलसँग समारी इन्टरनेसनल इभेन्ट/समारी ग्रुपका प्रमुख कार्यकारी अधिकृत (सीईओ) भरत समारी रहनेछन्, जसले नेपालको अन्तर्राष्ट्रिय सहभागिताको समन्वय तथा व्यवस्थापन गरिरहेका छन्।

प्रतिनिधिमण्डलको अग्रपंक्तिमा रहेकी ४७ वर्षीया सुमित्रा श्रेष्ठ (रोसी) हालै मिसेस नेपाल इन्टरनेसनल वर्ल्ड २०२६ को प्रतिष्ठित उपाधिबाट सम्मानित भएकी हुन्। गायिका तथा व्यवसायीका रूपमा परिचित श्रेष्ठले आत्मविश्वास, व्यक्तित्व, शालीनता, प्रस्तुति तथा समग्र प्रदर्शनका आधारमा राष्ट्रिय उपाधि हासिल गरेकी हुन्। उनले मिसेस क्लासिक एसिया इन्टरनेसनल मा नेपालको प्रतिनिधित्व गर्दै नेपाली महिलाको गरिमा, मौलिकता, सांस्कृतिक पहिचान तथा आत्मविश्वासलाई अन्तर्राष्ट्रिय मञ्चमा प्रस्तुत गर्नेछिन्।

त्यसैगरी ४३ वर्षीया कल्पना प्रसाईं (कामना) ले मिसेस नेपाल इन्टरनेसनल वर्ल्ड २०२६ की प्रथम रनर–अप को उपाधि जितेकी हुन्। सामाजिक अभियन्ताका रूपमा सक्रिय प्रसाईंको सहभागिताले समकालीन समाजमा सामाजिक उत्तरदायित्व बोकेका महिलाको बढ्दो भूमिकालाई उजागर गर्दछ। उनले मिसेस एसिया इन्टरनेसनल मा नेपालको प्रतिनिधित्व गर्दै नेपाली समाजको सांस्कृतिक समृद्धि, सामाजिक मूल्य–मान्यता तथा उपलब्धिमूलक महिला व्यक्तित्वको समसामयिक स्वरूपलाई अन्तर्राष्ट्रिय समुदायसमक्ष प्रस्तुत गर्ने अवसर प्राप्त गर्नेछिन्।

प्रतिनिधिमण्डलकी अर्की महत्वपूर्ण सदस्य ४८ वर्षीया गंगा न्यौपाने राउत (गम्भीर गंगा) हुन्, जसले मिसेस नेपाल इन्टरनेसनल वर्ल्ड २०२६ की तेस्रो रनर–अप को सम्मान प्राप्त गरेकी छन्। हाल एलएलबी अध्ययनरत गंगाले प्रतिनिधिमण्डलमा शैक्षिक चेतना, बौद्धिकता र निरन्तर आत्मविकासको पक्षलाई थप सशक्त बनाएकी छन्। उनको सहभागिताले सौन्दर्य प्रतियोगिता अब केवल बाह्य आकर्षणमा सीमित नरही शिक्षा, आत्मविश्वास, नेतृत्व, व्यक्तित्व विकास, सामाजिक चेतना र उद्देश्यपूर्ण जीवनदृष्टिलाई समेत प्राथमिकता दिने आधुनिक मञ्चका रूपमा विकसित हुँदै गएको तथ्यलाई प्रतिबिम्बित गर्दछ।
गंगाको अन्तर्राष्ट्रिय सहभागिता परिपक्व, शिक्षित तथा सचेत नेपाली महिलाको आकांक्षाको प्रतिनिधित्वसमेत हो। अध्ययनसँगै अन्तर्राष्ट्रिय पेजेन्टमा सहभागिता जनाउँदै उनले व्यक्तिगत विकास, ज्ञानार्जन तथा सामाजिक भूमिकाबीचको सन्तुलन प्रस्तुत गर्नेछिन्।

अन्तर्राष्ट्रिय मञ्चका लागि सघन तयारी
अन्तर्राष्ट्रिय सहभागितालाई प्रभावकारी, अनुशासित र प्रतिस्पर्धात्मक बनाउन नेपाली प्रतिनिधिहरूले स्टेज प्रेजेन्स, आत्मविश्वास, व्यक्तित्व प्रस्तुति, ग्रुमिङ, चालढाल, प्रदर्शन क्षमता तथा अन्तर्राष्ट्रिय पेजेन्टसम्बन्धी व्यवहारिक पक्ष समेटिएको विशेष तयारी गरेका छन्। उनीहरूको प्रशिक्षण तथा मार्गदर्शन अन्तर्राष्ट्रिय फेसन कोरियोग्राफर रोजिन शाक्यले गरेका छन्। फेसन कोरियोग्राफी तथा पेजेन्ट क्षेत्रमा लामो अनुभव भएका शाक्यले प्रतिनिधिहरूको मञ्चीय प्रस्तुति, चालढाल, आत्मविश्वास र अन्तर्राष्ट्रिय स्तरको प्रस्तुति क्षमतालाई परिष्कृत गर्न महत्वपूर्ण भूमिका निर्वाह गरेका छन्। नृत्य तथा प्रस्तुति प्रशिक्षणमा रीना श्रेष्ठ, सबरेना डान्स एन्ड फिटनेसकी सबिता महर्जन (सबरेना), अलग आर्ट हब, सातदोबाटो, ललितपुरका उत्तरकुमार थापा मगर तथा युनिक डान्स एकेडेमी, द्वाकोट, भक्तपुरका विक्रम सुनारको योगदान रहेको छ। उनीहरूको सामूहिक प्रशिक्षणले प्रतिनिधिहरूमा लय, समन्वय, मञ्चीय आत्मविश्वास, शारीरिक अभिव्यक्ति तथा प्रदर्शन अनुशासनलाई अझ सुदृढ बनाएको छ। तयारीको अर्को महत्वपूर्ण पक्षका रूपमा व्यावसायिक मेकअप आर्टिस्ट नीलम पौडेलद्वारा सञ्चालन गरिएको सेल्फ–मेकअप प्रशिक्षण रहेको छ। यस प्रशिक्षणमार्फत प्रतिनिधिहरूलाई अन्तर्राष्ट्रिय पेजेन्टका विभिन्न गतिविधिमा आफूलाई स्वयं व्यवस्थित तथा आकर्षक ढंगले प्रस्तुत गर्न आवश्यक व्यावहारिक मेकअप र ग्रुमिङ सीप प्रदान गरिएको छ।

प्रतिनिधिहरूको अन्तर्राष्ट्रिय पहिरन तथा फेसन प्रस्तुतीकरणमा एमकेएम फेसन हाउसकी हिमानी थापा मगर, टिकाथली, ललितपुरस्थित बिनिता बुटिककी बिनिता चौधरी तथा सूर्यविनायकस्थित द जेमा फेसनकी सुशीला लामाको रचनात्मक योगदान रहेको छ। त्यसैगरी मण्डला ब्याङ्क्वेट, तीनकुने, काठमाडौं, जसका प्रतिनिधि कृष्ण पाण्डे हुन्, कार्यक्रमको भेन्यु पार्टनरका रूपमा आबद्ध रहेको छ। मिसेस क्लासिक एसिया इन्टरनेसनल तथा मिसेस एसिया इन्टरनेसनल २०२६ आगामी १२ देखि १९ अक्टोबर २०२६ सम्म थाइल्यान्डको खोन काएनमा आयोजना हुँदैछ। एसियाका विभिन्न राष्ट्र तथा विश्वभर रहेका एसियाली मूलका महिलाहरूको सहभागिता रहने अपेक्षा गरिएको यस अन्तर्राष्ट्रिय मञ्चले सौन्दर्य र शालीनतासँगै नेतृत्व, महिला सशक्तीकरण, सांस्कृतिक आदानप्रदान, प्रतिभा, व्यक्तिगत उपलब्धि, मैत्रीभाव तथा अन्तर्राष्ट्रिय सद्भावलाई प्राथमिकता दिनेछ।