मुस्ताङ, धार्मिक र पर्यटनका लागि प्रसिद्ध मुस्ताङमा आज विश्व पर्यटन दिवस विभिन्न कार्यक्रमका साथ मनाइएको छ। अन्नपूर्ण संरक्षण क्षेत्र परियोजना (ACAP) जोमसोम र लोमान्थाङले छुट्टाछुट्टै कार्यक्रम आयोजना गरेका हुन्।
जोमसोम विमानस्थलमा विमानमार्फत आएका विदेशी पर्यटकलाई स्कार्फ र फूलसहित परम्परागत बाजागाजाले स्वागत गरिएको थियो। स्थानीय आमाहरूको समूह र इन्द्रबाक्स गाना समूहले संयुक्त रूपमा स्वागत कार्यक्रम प्रस्तुत गरेका थिए।
सडकमार्ग हुँदै आएका पर्यटकलाई घाँसा चेकपोष्टमा एसीएपी प्रतिनिधि, स्थानीय आमाहरूको समूह र जनप्रतिनिधिहरूले स्वागत गरे। त्यस्तै, माथिल्लो मुस्ताङको लोमान्थाङमा पनि पर्यटक स्वागत कार्यक्रम गरिएको एसीएपी कार्यालय प्रमुख उमेश पौडेलले बताए।
हालैका जेन-जी आन्दोलनका कारण प्रभावित स्थानीय पर्यटन व्यवसायीहरूलाई जोमसोम–पोखरा हवाई सेवा पुनः सञ्चालनसँगै आशा पलाएको छ। शुक्रबार मात्र समिट एयरले तीनवटा उडानमार्फत अन्तर्राष्ट्रिय पर्यटक ल्याएको जोमसोम स्टेशन प्रमुख सुमन ठकालीले जानकारी दिए।
